Раҷаббой Аҳмадзода, раиси вилояти Суғд, гуфт, вазъ дар марзи Тоҷикистону Қирғизистон "ором аст" ва баровардани нерӯҳо оғоз шудааст. Марзи Тоҷикистону Қирғизистон ду рӯзи охир шоҳиди муноқишаи хунин шуд, ки аз ҳарду тараф даҳҳо захмӣ ва кушта боқӣ гузошт.

Аҳмадзода, ки дар шаҳри Исфара қарор дорад, рӯзи 30-юми апрел ба Радиои Озодӣ гуфт, "шаби гузашта вазъ ором буд ва ягон ҳодисаи нохуш нашуд." Ҳарчанд баъзе аз сокинон гуфтанд, шаби гузашта тирпарониҳои пароканда шунида шуд.

“Гуфтугӯҳо оғоз шуданд. Комиссияи байни Тоҷикистону Қирғизистон барои баровардани қувваҳо ва аз сар гирифтани равуо ва барқарории сулҳу осоиш барои ду халқ ташкил шудааст”, -- гуфт раиси вилояти Суғд.

Хабарнигори Радиои Озодӣ, ки дар Исфара қарор дорад, мегӯяд, занону кӯдаконро аз деҳаҳои Хоҷа Аъло ва Сомониён ба таври дастҷамъӣ ба ҷойҳои амн мекӯчонанд. Хабарнигори мо мегӯяд, роҳ миёни Исфара ва Ворух расман кушода аст, аммо сокинон аз рафтуо дар ин масир хавф доранд. Бо вуҷуди ин, мошинҳои "Ёрии таъҷилӣ" захмиёнеро, ки аз дирӯз дар маҳаллаҳо монда буданд, ба беморхонаҳо интиқол медиҳанд.

Хабарнигорони Радиои Озодӣ ва "Азия-Плюс" дар ин ҷо барои муддати кӯтоҳ боздошт шуданд ва аз онҳо талаб карда шуд, ки наворҳои худро пок карда, дар бораи кӯчондани аҳолӣ гузориш надиҳанд.

Тоҷикистону Қирғизистон дар ҳоле барои баровардани артиш аз марз тавофуқ кардаанд, ки тибқи хабарҳо ҳарду тараф дар наздикии марз нерӯ ҷамъ мекунанд.

Ба ҷуз аз марзи Исфара ва Бодканд, сокинон гуфтанд, ки шаби гузашта дар ноҳияи Бобоҷон Ғафуров ва ноҳияи Лайлак низ тирпарронӣ шудааст.

Абдуҳамид Одинаев, муовини раиси ҷамоати Овчӣ-Қалъачаи ноҳияи Бобоҷон Ғафуров, гуфт, рӯзи 29-уми апрел ба ҷавони 32-солаи ин ҷамоат, Умедҷон Юсуфов тир расид ва ӯ ҷон дод. Одинаев гуфт, ба ҷуз ин чанд сокини дигари деҳаи “Овчӣ-Қалъача” ҳам захм бардоштанд.

Мақомоти Тоҷикистон аз додани маълумоти дақиқу комил дар бораи кушташудагону захмиёни ду рӯзи низоъ дар минтақаи марзӣ сарпечӣ мекунанд.

Вазорати тандурустии Қирғизистон шумори умумии маҷруҳонро дар муноқишаи ахир 134 ва теъдоди фавтидагонро 13 нафар гуфт.

Раиси вилояти Суғд гуфт, вазъ дар марзи ноҳияи Бобоҷон Ғафуров ҳам муътадил аст.

Мақомот дар вилояти Бодканди Қирғизистон ҳам вазъро муътадил арзёбӣ карданд ва гуфтанд, он таҳти назорат аст. Бахши қирғизии Радиои Озодӣ бо такя ба Раёсати Вазорати корҳои дохилии Қирғизистон дар Бодканд хабар дод, ки айни замон дар минтақаи наздимарзӣ таҳти назорати комил аст ва кормандони ниҳодҳои қудратӣ посгоҳҳо таъсис дода, бо аҳолии маҳаллӣ корҳои фаҳмондадӣ мегузаронанд.

"Бо мақсади таъмини амнияти сокинони маҳаллӣ, милитсия дар якҷоягӣ бо ҳайати шахсии Раёсати корҳои дохилии вилоят ва дигар сохторҳои қудратӣ тартиботи ҷамъиятиро тақвият мебахшанд", -- омадааст дар хабар.

Дастгоҳи раёсати ҷумҳури Қирғизистон ҳам рӯзи 30-юми апрел бо нашри изҳороте гуфт, вазъ дар вилояти Бодканд ба эътидол омада, зери назорати президент Содир Ҷабборов қарор дорад. Дар баёнияи дафтари раёсати ҷумҳури Қирғизистон омадааст, ки "айни замон ба фиристодани ихтиёриён ба минтақаҳои наздимарзӣ ниёз нест ва даъват мекунад, ки ин кор ба мақомоти дахлдорӣ давлатӣ, ки намояндагони онҳо дар қисмати марзи давлатии Тоҷикистон ва Қирғизистон ҷойгиранд, супорида шавад".

Муноқиша дар марзи Тоҷикистону Қирғизистон рӯзи 28-уми апрел дар наздикии дарғот ё Маркази тақсими об шуруъ шуда, рӯзи 29-уми апрел идома кард. Сокинон якдигарро ба сангандозӣ ва мақомоти марзбонии ду кишвар якдигарро ба шурӯи тирпарронӣ айбдор карданд.

Дар даргирии ду рӯзи охир аз ду тараф даҳҳо нафар захмӣ шудаанд. Вазорати тандурустии Қирғизистон дар бораи фавти се нафар гузориш дод. Мақомоти Тоҷикистон расман теъдоди маҷруҳон ва ҳалокшудагонро нагуфтаанд.

Пас аз ду рӯзи муноқишаҳои хунин, дершаби 29-уми апрел ҳайатҳои Тоҷикистон ва Қирғизистон барои хатми муноқиша ва оғози гуфтугӯҳо ба созиш расиданд. Тибқи ин созиш, ҷонибҳо муноқишаи мусаллаҳонаро хотима мебахшанд, ҳайати шахсӣ ва таҷҳизоти ҳарбиро ба макони доимии ҷойгиршавиашон бармегардонанд ва барои роҳ надодан ба ташаннуҷи авзоъ чораҳо меандешанд.

Тоҷикистону Қирғизистон 970 километр марз доранд ва танҳо 519 километри онро таъину аломатгузорӣ кардаанд. Боқимонда минтақаҳои баҳсӣ ҳастанд. Ин вазъ аксар вақт боис ба ихтилофи назар дар истифодаи обу замин дар минтақаҳои наздимарзӣ шуда, баъзан бо маргу захмӣ шудани сокинон меанҷомад.

Бар асари ҳамлаи афроди мусаллаҳ ба бинои Додгоҳи вилояти Систон ва Балучистон дар шаҳри Зоҳидон, 6 тан кушта ва 22 нафари дигар захмӣ шуданд.

Робитаи умумии Сипоҳи посдорони Эрон хабар дод, ки дар ҳоли ҳозир вазъи шуморе аз захмиёни ҳодиса вахим аст. Ба гуфтаи манбаъ, се узви "Ҷайш-ул-Адл" ҳам дар ин ҳодиса кушта шуданд.

Додгоҳи олии Эрон рӯзи 26 июл тасдиқ кард, ки бинои Додгоҳи умумии вилояти Систон ва Балучистон дар шаҳри Зоҳидон ҳадафи ҳамлаи афроди ношинос қарор гирифтааст.

Баёнияи расмии Додгоҳи олии Эрон ин ҳамларо "террористӣ" номида, мегӯяд, ки дар ин ҳодиса чанд нафар захмӣ шудаанд.

Гурӯҳи "Ҷайл-ул-Адл" масъулияти ин ҳамларо ба ӯҳда гирифтааст.

"Ҷайш-ул-Адл", ки аз сӯи Эрон ва Амрико ба унвони гурӯҳи террористӣ шинохта мешавад, иддао мекунад, ки барои ҳуқуқи балучҳо бо Ҷумҳурии исломӣ, мубориза мекунад.

Ин гурӯҳ борҳо бо нерӯҳои Сипоҳ ва марзбонони Эрон дар Систон ва Балучистон даргир шуда, шуморе аз онҳоро гаравгон гирифта ё ба қатл расондааст.

Созмони Паймони Амнияти Дастҷамъӣ (СПАД) рӯзи 25 июл нишасте барои баррасии роҳҳои тақвияти марзи Тоҷикистон бо Афғонистон баргузор кард.

Хабаргузории русии "Интерфакс" ба нақл аз баёнияи дафтари матбуотии ин созмон гузориш дод, ки дар ин ҷаласа, ки дар шаҳри Минск баргузор шуд, тақвият ва таҷҳизи марзи Тоҷикистон бо Афғонистон мавриди баҳс қарор гирифт.

Ба навиштаи манбаъ, дар ин ҷаласа феҳристи силоҳҳои нерӯҳои марзии Тоҷикистон дар марзи Афғонистон баррасӣ шуд.

Тоҷикистон бо Афғонистон беш аз 1300 километр марзи муштарак дорад.

Бо вуҷуди ба расмият шинохта шудани ҳукумати Толибон аз сӯи Русия ва афзоиши робитаҳои иқтисодӣ ва тиҷоратӣ байни кишварҳои Осиёи Марказӣ ва Толибон, ин кишварҳо борҳо нигаронии амниятии худро дар мавриди Афғонистон иброз кардаанд.

Рамазан Қодиров, раҳбари Чеченистон дар шаҳри Бодруми Туркия аз ғарқ шудан наҷот ёфтааст.

Расонаҳои Туркия рӯзи ҷумъа гузориш доданд, ки ин ҳодиса 24 июл дар як меҳмонхонаи панҷситора дар минтақаи Кайнари шаҳри Бодрум рух дод. Гуфта мешавад, ки Рамазон Қодиров ба дохили об афтода ва андаке пас аз он беҳуш шуд.

Тибқи гузоришҳо, ӯ барои шино вориди об шуда буд, аммо ногаҳон контроли худро аз даст дод ва ба зери об рафт.

Кормандони меҳмонхона пас аз мушоҳидаи вазъ, билофосила вориди амал шуданд ва ӯро аз об берун кашиданд.

Рамазон Қодиров, раҳбари Чеченистон аз ҷумлаи муттаҳидони Владимир Путин, раисҷумҳури Русия ба шумор меравад, ки ба ҷанги Русия бо Украина нерӯ фиристодааст.

Ухнаагийн Хурэлсух, раиси ҷумҳури Муғулистон гуфтааст, ки кишвараш метавонад ба Тоҷикистон гӯшти ҳалол содирот кунад. Дафтари матбуоти раёсати ҷумҳурии Муғулистон бо нашри баёнияе дар бораи сафари раҳбари кишвар ба Душанбе гуфтааст, ки Ухнаагийн Хурэлсух ҳангоми дидор бо Эмомалӣ Раҳмон дар рӯзи 24-уми июл суҳбат кардааст.

Дар баёния омадааст: “Муғулистон метавонад ба Тоҷикистон гӯшти ҳалол содир кунад ва имкони истеҳсол ва содироти дигар маҳсулоти гӯшти ҳалолро ба роҳ монад. Дар Тоҷикистон, солҳои ахир қимати гӯшт, бахусус гӯшти гову гӯсфанд фавқуллода баланд рафтааст, чун дар худи кишвар ба қадри кофӣ чорво парвариш намеёбад ва воридоти гӯшт аз хориҷ зиёд мешавад.

Муғулистон, ки як кишвари умдатан чорвопарвар дар ҷаҳон ба ҳисоб меравад, соли гузашта ба хориҷ бештар аз 80 000 тон гӯшт ва маҳсулоти гӯштӣ фурӯхтааст. Мизоҷонаш ҳам Русия, Чин ва Эрон будаанд.

Зимни нахустин сафари давлатии раиси ҷумҳури Муғулистон ба Душанбе даҳ санади ҳамкорӣ ба имзо расид. Тиҷорати ду кишвар дар соли 2024 бино ба гузоришҳо фақат 50 000 доллар будааст, ки баёнгари набуди ҳамкориҳои иқтисодӣ миёни Тоҷикистону Муғулистон аст.

Раиси Кумитаи сохтмон ва меъмории Тоҷикистон мегӯяд, Боғи ҳайвоноти Душанбе аз маркази шаҳр ба дигар ҷой мебаранд. Низом Мирзозода рӯзи 25-уми июл дар нишасти хабарӣ гуфт, “нақшаи муфассал” мешавад, аммо ҷузъиёти бештар надод. Дар ҳошияи ин нишасти хабарӣ, як масъули идораи сохтмонии шаҳри Душанбе ба Радиои Озодӣ гуфт, Боғи ҳайвонотро ба наздикии шаҳри Ҳисор мекӯчонанд.

“Нақшаи нави Боғи ҳайвонот дар марҳилаи тасдиқ аст. Баъди тасдиқи лоиҳа сохтмони Боғи нави ҳайвонот оғоз мешавад. Ин иншоот 5 километр дуртар аз пойтахт ва дар наздикии шаҳри Ҳисор сохта мешавад,”- афзуд масъули идораи сохтмони Душанбе.

Талабҳо барои кӯчондани Боғи ҳайвонот аз пойтахт ва беҳтар кардани шароити нигаҳдории ҷонварон борҳо садо додааст. Фаъолони ҷамъиятӣ борҳо аз вазъи бади нигаҳдории ҷонварон дар Боғи ҳайвоноти Душанбе бонги изтироб задаанд. Меҳмонон ва сокинон пайваста бо нашри аксу навор аз ҳоли ҷонварон дар дохили панҷараҳо шароити боғро танқид мекунанд. Бархе аз ин боғ ба унвони "зиндони ҷонварон" ном мебаранд ва бархе ҳам нигаҳдории ҷонваронро дар чунин шароит номумкин медонанд.

Аммо Низом Мирзода, раиси Кумитаи сохтмон ва меъморӣ 25-уми июл ин гуна танқидҳоро ғаразнок номид. “Бас кунед ғаразнок навиштанро. Шояд бемасъулиятии роҳбари онҷо бошад. Вале ҳаминро реклама карда ба ҷаҳониён камбудҳои худро нишон диҳем, магар айб нест,”-гуфт раиси Кумитаи сохтмон.

Боғи ҳайвоноти Душанбе дар солҳои шастуми асри гузашта сохта шудааст. То ин замон бозсозии зиёдеро аз сар нагузарондааст. Масоҳати он ҳудуди 5 гектарро ташкил медиҳад ва бештар аз 1000 ҷонварро дар онҷо нигаҳ медоранд.

Кумитаи сохтмон ва меъмории Тоҷикистон болоравии чашраси нархи манзил дар шаҳри Душанберо тасдиқ кард ва гуфт, ҳар як метри мураббаъ хона дар пойтахт ба 800 доллар расидааст. Ин назар ба аввали сол 200-250 доллар зиёдтар будааст.

Низом Мирзозода, раиси Кумитаи сохтмон ва меъморӣ 25-уми июл дар ҳузури хабарнигорон гуфт, соҳибкорон дар гузоштани нарх озод ҳастанд, "вале инсоф ҳам зарур аст".

Ба гуфтаи Раиси Кумитаи сохтмон ва меъморӣ, имсол бо назардошти поёнравии қурби доллар, нархи маҳсулоти сохтмонӣ коҳиш ёфт, вале нархи манзил боло рафт. Низом Мирзозода болоравии нархи манзилро ба талаботи бозор рабт дод.

Баъзе аз сокинон шикоят мекунанд, ки нархи манзил дар Тоҷикистон, хусусан дар пойтахти кишвар, гарон буда, қобилияти хариди онро надоранд.

Бонкҳо барои гирифтани хона ба мардум қарзи дарозмуддат ё ипотека пешниҳод мекунанд, вале бо шарту баҳрае, ки соҳиби хона шудан барои иддае фақат орзу мемонад.

Дар пайи ҳалокати сарнишинони як ҳавопаймои мусофирбар дар Русия, Эмомалӣ Раҳмон, раисиҷумҳури Тоҷикистон бо ирсоли паёме ба ҳамтои русаш Владимир Путин, ба пайвандону наздикони ин садама ҳамдардӣ кард.

Дар ин барқия, ки дафтари матбуоти раисиҷумҳури Тоҷикистон нашр кард, Эмомалӣ Раҳмон гуфтааст, "хабари фоҷеаи ба ҳалокат расидани мусофирон дар натиҷаи суқути ҳавопаймои мусофирбар дар вилояти Амури Федератсияи Русия боиси андӯҳи амиқи мо гардид. Таъзияву таслияи самимии инҷонибро ба пайвандону наздикони фавтидагон изҳор менамоем".

Ҳавопаймои Ан-24-и ширкати "Ангара", ки дар хатсайри Хабаровск-Благовешенск-Тинда парвоз мекард, рӯзи 24-уми июл дар вилояти Амур вожгун шуд.

Ҳокими ин вилоят гуфт, дар дохили ҳавопаймо 43 мусофир, аз ҷумла 5 кӯдак ва 6 хадама ё ҳайати парвоз буданд. Боқимондаҳои ҳавопаймо дар доманаи кӯҳ, 15-километрии Тинда, дар минтақаи душворгузар пайдо шудааст.

Ҳавопаймои суқуткарда тақрибан 50 сол пеш дар корхонаи ҳавопаймосозии "Авиант"-и Киев истеҳсол шудааст.

Ҳабибулло Назарзода, роҳбари Оҷонсии ҳавонавардӣ дар нишасти хабарии рӯзи 23-юми июл дар Душанбе гуфт, нархи билети ширкатҳои ҳавопаймоии дохилӣ ва хориҷӣ дар Тоҷикистон "моҳҳои наздик" арзон мешавад.

Вале ӯ санаи арзоншавии чиптаҳоро дақиқан эълон накард.

Назарзода арзоншавии қимати билетро ба сиёсати "Осмони боз", ки чанде пеш дар Тоҷикистон эълон кард, рабт додааст.

Ба гуфтаи ӯ, бо мақсади кам кардани арзиши билет, мудирияти Фурудгоҳи Душанбе тасмим гирифтааст, ки ба ҳамаи ширкатҳои ҳавопаймоӣ дар хидматрасонии рӯизаминӣ 40 дарсад тахфиф пешниҳод кунад.

Гарон будани нархи билети ҳавопаймо баъзе муҳоҷирони тоҷикро маҷбур кардааст, ки аз роҳҳои заминӣ аз ҷумла, тариқи автобус ба Тоҷикистон баргарданд.

Сафар бо нақлиёти заминӣ то 3-4 рӯз тӯл мекашад ва муҳоҷирон мегӯянд, дар роҳҳо, бахусус дар биёбонҳои Қазоқистон, азоб мекашанд.

Мақомоти интизомӣ дар Хатлон мегӯянд, танҳо дар шаш моҳи гузаштаи имсол, дар садамаҳои нақлиётӣ дар вилоят риштаи ҳаёти 31 тифл ва навраси то 16-сола канда шудааст. Дар барномае, ки Раёсати вазорати корҳои дохилӣ дар вилояти Хатлон рӯзи 24-уми июл дар Фейсбук нашр кард, омадааст, ки миёни қурбониён 14 нафар кӯдаки то 7 сола ҳастанд. Бақия ва ё 17 нафари дигар кӯдакону наврасони то 16-сола будаанд.

Дар ин барномаи телевизионӣ гуфта мешавад, ки дар умум дар роҳҳои вилояти Хатлон дар ним сол 131 нафар ҷон додаанд ва вазъ бо садамаҳои нақлиётӣ дар қаламрави вилоят изтиробангез боқӣ мемонад. Бар асоси таҳлили мутахассисони Бозрасии давлатии автомобилӣ сабаби аслии садамаҳои маргбори нақлиётӣ дар вилояти ҳаракат бо суръати баланд аст. Ҳиссаи садамаҳои нақлиётии маргбор ба сабаби ҳаракат бо суръати баланд 46 дар сад будааст. Дар ин муддат дар Хатлон ба ҳамин сабаб 93 садамаи нақлиётӣ ба вуқуъ пайвастааст ва дар натиҷаи онҳо 67 нафар ҷон додаанд ва 73 каси дигар маҷруҳ шудаанд.

Солона дар садамаҳои нақлиётӣ дар Тоҷикистон садҳо кас кушта ва маъюби якумрӣ мешаванд. Мошинҳои куҳнаву роҳҳои ноҳамвор, ҳаракат бо суръати баланд ва риоя накардани қоидаҳои ҳаракат аз сабабҳои маргумири зиёд дар роҳҳо номбар мегардад. Танҳо дар соли гузашта дар Тоҷикистон 552 нафар ва ё рӯзона аз як то ду кас дар натиҷаи садамаҳои нақлиётӣ, ё дар ҷойи ҳодиса ва ё дар шифохона ҷон додаанд.

Дар шаш моҳи аввали имсол наздик ба 600 ҷасади шаҳрванди Тоҷикистонро тариқи ҳавопаймо аз Русия ба ватан овардаанд. Танҳо тариқи Фурудгоҳи Душанбе тобути 569 нафар ба ватан оварда шудааст.

Дар ин бора дар варақаи иттилоотии кори нимсолаи ин фурдугоҳ дар рӯзи 23-уми июл хабар дода шуд. Шумораи тобутҳое, ки аз роҳи заминӣ ба Тоҷикистон оварда шудаанд, ҳам маълум нест.

Рӯзи 24-уми июли соли гузашта Оҷонсии ҳавонавардии Тоҷикистон гуфта буд, ки давоми ним сол ҷасади қариб 180 нафарро ба Тоҷикистон оварданд. Соли 2023 ба Тоҷикистон ҳудуди 850 тобут оварда шуда буд.

Ҳар сол то ҳазор тобути муҳоҷирон аз Русия ба Тоҷикистон оварда мешавад. Сабаби марги онҳо куштор, беморӣ ва садамаву тасодуф дар сохтмон гуфта мешавад.

Дар шаш моҳи аввали соли ҷорӣ 51 табиб ҷойи кори худро тарк карда, ба муҳоҷират рафтаанд. Дар ин бора Ҷамолиддин Абдуллозода, вазири тандурустӣ ва ҳифзи иҷтимоии аҳолӣ, хабар дод.

Абдуллозода гуфт, дар ин давра дар умум 655 табиб ба кор қабул гардида, 508 табиб соҳаро тарк кардаанд.

Дар ҳамин ҳол, ба гуфтаи Абдуллозода аз 51 нафаре, ки ба муҳоҷират рафтаанд, 31 нафари онҳо имрӯз ба Тоҷикистон баргашта, фаъолияти худро идома медиҳанд.

Вазири тандурустӣ гуфт, сол аз сол бо мақсади муҳоҷират соҳаро тарк кардани табибон коҳиш меёбад ва дар муқоиса бо солҳои пешин, ки дар як сол то 500-600 табиб ба муҳоҷирати меҳнатӣ мерафтанд, ин омор хеле коҳиш ёфтааст.

Бисёре аз кормандони соҳаи тиббии Тоҷикистон, ки дар Русия кор мекунанд, пеш аз ҳама музди беҳтарро далели муҳоҷират меноманд.

Ба иттилои расмӣ, феълан дар соҳаи тибби Тоҷикистон ҳазору 600 мутахассис намерасад.

Дар минтақаҳои дурдасти кишвар аксаран табибони оилавӣ, инчунин мутахасиссони соҳаҳои наркология ва силшиносӣ, ренгинологҳо ва дар баъзе манотиқ табибони бемориҳои занона ва ҷарроҳон намерасанд.

Раиси Худамоти алоқа мегӯяд, нархи интернет дар Тоҷикистон арзон ва суръати он беҳтар шудааст.

Исфандиёри Саъдулло, раиси ин Хадамот рӯзи 23-юми июл ба журналистон гуфт, арзиши миёнаи интернет бо суръати 1 Мбит/с ба 17 сомонӣ коҳиш ёфта, нархи миёнаи 1 ГБ бастаи интернети мобилӣ ба 2,5 сомонӣ расонида шуд.

Ӯ афзуд, онҳое, ки таърифаи интернеташон ҳоло аз 5 Мбит/с паст аст, метавонанд ба ширкатҳои мобилии хидматрасон шикоят кунанд, то ба мушкилашон расидагӣ шавад.

Ваъдаи раиси Хадамоти алоқа дар ҳолест, ки шикоятҳо аз нархи гарону сифати пойини интернет дар Тоҷикистон солҳо боз садо медиҳад.

Дар радабандии моҳи апрели Speedtest Global Index, Тоҷикистон аз рӯйи суръати интернети сабтшуда (ноқилӣ) миёни 155 кишвар зинаи 117-умро касб кардааст.

Раёсати Кумитаи ҳолатҳои фавқулода дар вилояти Суғд иттилоъ дод, ки чор нафар сокинони шаҳри Истаравшан ҳангоми кандани хандақ зери хок мондаву яке аз онҳо ба ҳалокат расидааст.

Бино ба иттилои манбаъ, ин афрод замоне зери хок монданд, ки саргарми кандани хандақ буданд ва баногаҳ хоки азим болояшон сарозер шуд.

Аз ин ҳодиса се нафар бо ҷароҳатҳои вазнин ба бемористони шаҳри Истаравшан интиқол дода шуданд.

Манбаъ мегӯяд, ки дар кори наҷоти зерихокмондагон афсарони бахши Раёсати Кумита дар шаҳри Истаравшан ҳамроҳ бо сокинон саҳм доштаанд.

Шахси ҳалокшуда дар ин ҳодиса як сокини 31-солаи маҳаллаи Навоӣ, кӯчаи Очил Абдураҳмон буд.

Захмиён сокинони кӯчаи Турсунзодаи маҳаллаи Навоии шаҳри Истаравшан буда, ду нафарашон 31-сола ва як нафари онҳо 21-сола мебошад.

Сабаби ҳодиса риоя накардани қоидаҳои бехатарӣ ҳангоми кор гуфта шудааст.

Ҳафтаномаи «Фараж» дар Тоҷикистон пас аз бист соли нашр дигар ба шакли рӯзнома ба дасти хонанда намерасад ва ҳайати эҷодии ин нашрия фаъолияти худро дар саҳифае бо номи «Фараҳ» дар шабакаҳои иҷтимоӣ аз ҷумла Фейсбук пеш мебаранд.

Хуршеди Атовулло, муассиси ҳафтаномаҳои «Фараж» ва «Самак» рӯзи 23 июл ба Радиои Озодӣ гуфт: «Мо мехоҳем, шакли корро дигар кунем, шакли тарғибро дигар кунем фоида нест аз газета аз баҳри нашри чопӣ алъон гузаштем. Номашро аз «Фараж» ба «Фараҳ» баргардон кардем.”

Ҳафтаи гузашта дар шабакаҳои иҷтимоӣ аз ҷумла дар Фейсбук гузоришҳое нашр шуд ва дар он мегуфтанд, ки мақомоти Тоҷикистон нашрияҳои «Фараж» ва «Самак»-ро бастаанд. Аммо Хуршеди Атовулло, муассиси нашрияҳо ин хабарҳоро рад кард ва гуфт, қароре дар бораи баста шудани «Фараж» ва «Самак» содир нашудааст.

Вай афзуд «Фараж», ки як гиёҳи бисёр талх аст, пас аз 20 сол дигар «Фараҳ», яъне хушҳолӣ шуд. Ба гуфтаи хабарнигори тоҷик, нашрияи «Самак» 226 нусха чоп мешуд ва хароҷоти ҳафтаинааш 1800 сомонӣ буд. Сардабири нашрияҳо мегӯяд давраи тиллоии «Фараж» солҳои 2007-2012 буд, ки он замон наздики 15000 нусха нашр мешуд. Ӯ афзуд: “Имрӯз “Самак” 226 дона теъдоди нашр дораду «Фараж» наздики дуним се ҳазор. Акнун бубинед, маоши кормандон, иҷора, интернет, техника ба замми ин ҳама қимати гарони чоп.”

Нахустин шумораи «Фараж» рузи 22 декабри соли 2005 ба чоп расида буд.

Боз шудани фазои Афғонистон убури ҳавопаймоҳо аз осмони Тоҷикистонро ба таври қобили мулоҳиза кам кардааст.

Лоиқ Бегиҷонзода, директори корхонаи "Тоҷикраэронавигатсия" 23-юми июл гуфт, то соли 2024 фазои Афғонистон танҳо 20-30 дарсад боз буд ва ҳавопаймоҳои хориҷӣ бартарӣ медоданд, ки аз фазои Тоҷикистон убур кунанд.

Аммо ба гуфтаи Бегиҷонзода, имсол фазои Афғонистон пурра боз шуд ва убур (транзит)-и ҳавопаймоҳо аз фазои Тоҷикистон қариб 7 ҳазор парвоз кам шуд.

Бо кам шудани убури ҳавопаймоҳо аз фазои Тоҷикистон, даромади корхонаи "Тоҷикаэронавигатсия" дар нимаи аввали имсол 52 дарсад кам шудааст.

Ин корхона дар ним сол 122 миллион сомонӣ даромад гирифтааст, ки назар ба ҳамин давраи соли гузашта 52 дарсад камтар будааст.

Лоиқ Бегиҷонзода афзуд, ки онҳо талош доранд бо боз кардани кардани хатсайрҳои нав, даромади корхонаро зиёд кунанд.